Бу түбэлтэ 1959-60-с сылларга буолбута. Оччолорго оскуоланы бүтэрэн баран, колхозка үлэлээтэххинэ эрэ үөрэххэ ыытар кэмнэрэ этэ.

Биир сайын Хадаҥҥа саһыл ферматыгар үүт таһааччынан үлэлээбитим. Сайылык ферма ыраах баҕайы, Хаанды күөлүн кыйа барыллар этэ. Оҕуһунан сыннарыахха диэтэххэ, куйааска кумаарга сылаалаах айан этэ. Сарсыарда баран баран күнүскү ыамҥа биирдэ тиийэҕин.

Оҕуһум кырдьаҕас бытаан баҕайы сүөһү, хааман быстыа баара дуо. Ол иһин утуктаамаары билэр, билбэт ырыабын тоҕо тардан кэбиһэбин.

Күһүн айанныырбар хараҥарар. Соҕотох буолан тэһийбэккэбин ырыам-тойугум өссө сүрдэнэр. Биирдэ Егоров Иван диэн киһи көрсөн: «Шура, ити туох ааттааҕын айдаараҕын? Ытаары олорор куспун көтүтэн кэбиспитиҥ», – диэбиттээх.

Хаанды айылҕата олус кэрэ, тулата барыта симэ үүммүт хатыҥ-чараҥ. Барар суолбуттан ойуурум 5-6 эрэ хаамыы курдук ыраах. Биир күн эмиэ ыллыы-ыллыы аргыый аҕай сыннаран истим. Халлаан күп-күөх, биир да былыт суох, ип-итии. Арай ол иһэн көрбүтүм ойуурум 15 см кэриҥэ кэтиттээх икки аҥыы силэллэн аһыллан хаалбыт. Өйдөөн көрбүтүм халлаан оройуттан, сир кырсыгар тиийэ түгэҕэ биллибэт сып-сырдык аһаҕас баар буолбут. Соһуйан да, дьиктиргээн да буолуо өссө үчүгэйдик көрөөрү гыммыппар, харахтарым аһыйыах курдук буолбуттарыгар чыпчылыйан ыллым. Онуоха чыпчылыйыам икки ардыгар били сырдыгым сүтэн хаалбыт, ойуурум мастара оннуларыгар тураллар.

Онтон ыла итинник дьикти сырдыгы көрө иликпин, туохха да тэҥнэммэт сырдык этэ. Ийэбэр кэпсээбиппэр «ырай аһылларын көрбүккүн, уһун үйэлээх буолсугун», – диэбитэ. Кырдьык ырайдара диэн итинник сырдыга буолуо дуо?

Ымыы кыыһа.

Сунтаар, Бордоҥ.

tuymaada 1 мая, 2026