1. ТУОХ: Остуоруйаларга итэҕэйбэт буолбуппут ыраатта. Ол да буоллар, араас туолбат баҕа санаалар биһигини толороллор.
   КИМ: Хас биирдии улааппыт кыыс сүрэҕин хайа эмит муннугар үрүҥ аттаах Прынц туһунан ыра санаа кистэнэн сытар.
   ХАННА: Манан хаһабыт!
   ТУГУ: Ким Дьиҥнээх, Улахан, Кэрэ Таптал туһунан ыраламматаҕа баарай?
   ОЛ ЭРЭЭРИ: Халлаантан сиргэ түһэ быдан ыарыылаах буолааччы!
   ОНОН? Прынцтар тустарынан киэҥник тарҕаммыт мифтэр тустарынан кэпсэтиҕиҥ.
2. Сардаана 14 сааһыттан хайдах кэргэн тахсыаҕын толкуйдуур буолбута. Кини санаатыгар, бастакы билсиһии маннык буолуохтааҕа:
   … Ардах түһэ турар. Тула — сиэрэй дьиэлэр, сиэрэй дьоннор… Эмискэ кини иннигэр кыраһыабай билбэт уола дьирэс гына түһэр. ЧалбАҕы чалбах диэбэккэ, тобуктуур уонна сибэккитин уунар. Күн тыган кэлэр, тула барыта күлүмүрдүү түһэр. Сиэттиспитинэн ханна эрэ ыраах, дьоллоох олоххо киирэн бара тураллар. HAPPY END.
   Оттон дьиҥнээх олоххо…
   Маннык түбэлтэлэр киинэҕэ эрэ үгүстүк буолаллар. Оттон дьиҥнээх real-га Прынцтар буолбакка, маньяктар көһүтэн турар буолуохтар этэ. Прынцтар суолга ыїылла сыппаттар ээ. Биллэн турар, бастакы көрүүттэн таптал диэн баар буолуон сөп. Ол эрээри билсиһэргэр төрүөт баар буолуохтаах. Холобур, уопсай интэриэс. Биир уочаракка турбуккут, бииргэ ролигынан хатааһылыы, хаҥкылыы сылдьыбыккыт, биир автобуһу кэтэһэҕит, эбэтэр, көннөрү бииргэ отоннуу, оттуу сылдьыбыккыт.
3. Катя хас сылдьыбыт уолун пионерскай дистанцияҕа тутар. Кини иһигэр уолаттар бары олус күүскэ таптыыллар, ол эрээри биллэрбэттэр дии саныыр. Оннук “таптыыр” уолу эрэйдиирин олус сөбүлүүр. Сценарий быһыытынан, салгыы: кыыс уолу таптыырын эмискэ өйдүү түһэр, ол эбэтэр уол остуоруйа прынцыгар кубулуйан хаалар. Муора кытыла. Романтичнай музыка. Оҕо көтөҕүүлээх куустуспут дьон тураллар. Киинэ бүтэр.
   Оттон дьиҥнээх олоххо…
   Мэлдьи бэриниилээх сүгүрүйээччилэр баар буолуохтарын сөп. Ол эрээри маннык киһилиин дьиҥнээх роман табыллыа суоҕа. Тоҕо диэтэххэ, кини — бэйэтин иһигэр конфликтаах киһи. Кини кыыһы кытта сыһыан кыыс атаҕын анныгар сыттахха эрэ табыллар диэн өйдөбүллээх. Ону сэргэ эппиэтинэстэн олус куттанар. Ол иһин Катя “романнара” уһаабаттар”.
4. Мааһыҥка кыра эрдэҕиттэн этиргэн кыыс. Кини мэлдьи ыралана саныырынан, биир сарсыарда уһуктан кэлбитэ — киһи билбэт буола ыран хаалбыт, букатын манекенщица курдук буолбут. Хантан саҥа фигуратыгар сөптөөх олус кыраһыабай таҥастар баар буолбуттар, ону кэтэн баран, оскуолатыгар барар. Уулуссаҕа дьон “бу урукку Мааһыҥка кыыс сылдьар ээ” диэбэттэр, хантан маннык кыраһыабай кыыс кэлэн хаалла? Дэһэллэр. Уолаттар толпанан сырса сылдьаллар. Онуоха кини “бу мин, Мааһыҥкабын” диэн итэҕэтэ сатаабат, урукку тириитин устан бырахпыт курдук, саҥа олоҕу саҕалыыр.
   Оттон дьиҥнээх олоххо…
   Oops, куһаҕан кус оҕотуттан куба буолар ыарахан. Саатар бастаан куба оҕото буолан төрүөххэ наада. Арай уһун кэмҥэ тренажернай залга спорду кытта доҕордоһон, аһыыр аска талымастык сыһыаннаһар, бэйэҕин күүскэ көрүнэр буоллахха, 100-тэн хас эмит бырыһыаныгар кырасаабысса буола улаатыахха, саатар “марба” диэн иҥмит ааттан аккаастаныахха сөп.
5. Дуунньа, этэргэ дылы, “балаҕан аайы баар” кыыс. Ону таһынан, бэйэтин көрдөрө, уолу-кыыһы кытары суксуруһа, кырааскалана хайыы сатаабат. Ол оннугар кинигэ ааҕарын, хоһоон суруйарын туохтааҕар да ордорор. Кини этэринэн, киһи тас көрүҥэ туох да оруолу оонньообот, кылаабынайа — дууһата кэрэ буолуохтаах. Ол иһин суругунан, эбэтэр телепатиянан алтыһан, доҕорбун булуом диэн бигэ эрэллээх.
   Оттон дьиҥнээх олоххо…
   Маннык түбэлтэҕэ киһи “тыыннаах” информация тиийбэтинэн, бэйэтин өйүгэр ол киһитин уобараһын ойуулаан көрөр. Уонна ол хартыынатыгар убанан хаалар. Ону таһынан, бэйэни киэргэтэн кэпсэнии диэн эмиэ баар. Онон суругунан, эбэтэр Интернетинэн кэпсэтии кэнниттэн көрсүһүү курус түмүктээх буолуон сөп.
6. Ира — олус хаһаайыстыбаннай кыыс. Кини арааһынай минньигэс салааттары, бөрүөктэри, тортары, бэрэскилэри буһарарын кылааһын оҕолоро бары билэллэр. Бырааһынньыктарга саамай элбэх уонна минньигэс астаах кини буолааччы. Кылааһын уолаттара бэрэскитин сииллэр уонна, тоҕо эрэ, киниэхэ наадыйбакка, муоданы сырсар Ленканы эккирэтиһэллэр. Онтон Ира олус хомойбот, тоҕо диэтэххэ, кини билэр (ханна эрэ истибитэ) — “эр киһи сүрэҕэр куртаҕынан киирэллэр”.
   Оттон дьиҥнээх олоххо…
   Кырдьык, уолаттар аһыылларын, кинилэри бүөбэйдииллэрин, сууйалларын-сотоллорун сөбүлүүллэр. Ол эрээри ити барыта оҕо сааҕын, пеленканы, көҥүл быһыллыытын уо. Д. А. Санатар. Онон 30 саастарыгар оннук бэлэм “хаайыыга” киирэн биэрэргэ сөбүлэһэллэр.
   Уонна, өскөтүн үөрэтэн кэбистэххинэ — киниэхэхамначчыт эрэ буоларгар тиийэҕин.
7. Лика — гимназия саамай кыраһыабай кыыһа. Төрөппүттэрэ таҥаска хаарчахтаабаттар. Кыра эрдэҕиттэн араас талаанын сайыннаран, музыкальнай, художественнай оскуолаларга сырытыннарбыттара, үҥкүү куруһуогар дьарыктаммыта. Үөрэҕэр үчүгэй. Элбэх сүгүрүйээччилэрдээх. Ол эрээри Лика киниэхэ кыһаммат уолаттары “сэриилээн” ыларын, атын кыргыттар уолаттарын “отбивайдыырын” сөбүлүүр. Тоҕо диэтэргин кини саамай кыраһыабай, саамай өйдөөх, ханнык баҕарар уолу эрийэн ылар кыахтаах.
   Оттон дьиҥнээх олоххо…
   Таптал бэйэтэ талан ылар — ким кимниин буолуоҕун.

Б. Махсыынап.
Куотана, Сунтаар.