(Хараҥа хос)

Быйыл кыһын Олимпийскай дэриэбинэ диэн ааттаах студеннар саҥа олоро киирбит уопсайдарыгар абааһы баар үһү диэн сурах студеннары, куорат атын да олохтоохторун тилийэ көттө. Буоларын курдук, этэрбэс араадьыйата үлүннэрэ-үлүннэрэ эбэн, сурах тэнийдэр тэнийэн истэ. Атын корпустарга олорор студеннар: “Кырдьык үһү, түүлээх “барабашканы” көрөн баран, хас да оҕо түннүктэн ыстаныталаабыттар үһү, ону уотунан ыраастыы сатаабыттар, " - диэн кэлэн кэпсээбиттэрэ. Саҥа корпус тутуллубут сиригэр соторутааҥҥа диэри эргэ дьиэлэр турбуттара, оттон сорохтор кэпсииллэринэн, кылабыыһа баара дииллэр. Ол чуолкайдамматах. Былыргы дьыллар быыллаах сабыыларын бүрүнэн, өссө туох-ханнык кистэлэҥнэрин эппэккэ тураллара буолуой?
Тыала суохха мас хамсаабат. Дьиҥ иһигэр киирдэххэ хайдаҕын, төһө сымыйатын-чахчытын билээри саҥа корпуска тиийэ сырыттыбыт.
Бу корпуска 255 оҕо олорор, үгүстэрэ Физкультура уонна спорт институтугар үөрэнэллэр. Ахсынньы саҥатыттан киирбиттэр. Манна кэрийэн көрө сылдьан, гостиницаҕа сылдьар курдук сананаҕын. Секционнай блоктарга иккилии, үстүү миэстэлээх икки хос баар. Душтара, туалеттара, түннүктэрэ-ааннара евроматырыйааллартан оҥоһуллубуттар. Оттон үчүгэй баҕайы сырдык мастан оҥоһуллубут, лаахтаах мебеллэрин “Сахамебель” фирмаҕа сакаастаан оҥорторбуттар. Маннык уопсайга киһи эрэ олоруон курдук. Оттон маннык усулуобуйаҕа олорор туһунан хас көлүөнэ студент ыра санаа кыыма оҥостубута буолуой?
Студеннар бэйэлэрин истэригэр араас санаа баар. Уолаттар: “Сымыйа буолуо, бэйэлэрэ санааларыгар оҥорон көрөн, итэҕэйэн кэбиспиттэрэ буолуо. Көрбөтөхпүт, абааһы суох, " - дэһэллэр. “Абааһы мин хоспор баар, бииргэ эбиэттээччибит, " - диир өрүөллэр эмиэ бааллар. Сорохтор: “Хата, бу күннэргэ бүлүүһэ сүүрдэн ыҥыран көрүөххэ баар эбит, " - дииллэр.
Оттон иккис этээскэ, ол “абааһыны көрбүт” секцияларыгар түһэ сырыттыбыт. Билигин ол айдааннаах икки хоско олорботтор. Утары хоско олорор кыргыттары кытары кэпсэттибит. Дьиҥнээҕэ маннык эбит.
Аан бастаан оҕолор саҥа көһөн кэлэллэригэр, биир уол утуйа сыттаҕына сирэйин түүлээх илии таарыйбыт диэн буолбут. Онтон кэнники ИФК 1 курсун уолугар көстөр буолбут, кинини аһаҕас харахтаах дииллэр эбит. Ол уол биир киэһэ ньиэрбинэйдээн арыгы иһэ сылдьыбыт. Кыргыттар иһиттэхтэринэ эмискэ хос иһигэр айдаан, хаһыы-ыһыы бөҕөтө буола түспүт. Сүүрэн тахсан көрбүттэрэ, уоллара көрүдүөргэ охто сытан, тэбиэлэнэ-тэбиэлэнэ: “Ол сылдьар! Абааһы сырса сылдьар! " - Диэн хаһыытыыр эбит. Ойон туран, көрүдүөр түннүгүн аһа сатаабыт. Оҕолор олус диэн куттаммыттар. Уолаттар уоскутан, хоһугар аҕалан хатаан кэбиспиттэр. Онно дьэ, ол түүн, абааһыттан куотабын диэн, иккис этээс түннүгүнэн ыстанан кэбиспит. Ойоҕоһун тосту түһэн, балыыһаҕа киирбит. Хос кураанах турдаҕына, магнитофон быатыгар проводтара хатыһан, уот туран, баһаар буола сыспытын умуруорбуттар. Кураанах хоско ким магнитофону холбообута өйдөммөт. Уопсайынан, бу түбэлтэҕэ киһи ылбычча итэҕэйэохсоро кыаллыбат. Тоҕо диэтэргит, биир киһи көрөрүн “галлюцинация” диэнэтиэхтэрин сөп. Ол эрээри кыра соҕус да буоллар, атын түбэлтэлэр эмиэ бааллар эбит.
Быһылаан туһунан сурах студеннары тилийэ көппүт. Бу этээскэ олоророҕолор куттанан, дьик-дьах туттар, атын сиргэ хоно сатыыр буолбуттар. Кыргыттар кэпсииллэринэн, атах тыаһын истэллэр, утуйа сытан баттаталлар, ким эрэ кэлэн суорҕаннарын тардыалыыр курдук буолар эбит. Биирдэ ким да суоҕуна, душтарыгар краннара холбонон кэлбит, уу күүскэ баҕайы тыкпыт. Бэйэтэ хайдах даҕаны холбонор кыаҕа суох үһү. Ол да буоллар: “Билбэппит, дьиҥнээхтик дуу, түүл-бит дуу курдук буоларын кыайан араарбаппыт, " - дииллэр. Бу түбэлтэҕэ эмиэ “самовнушение”, уйулҕа хамсааһына буолуо дуо? Билигин кыргыттар куттанан, сыттыктарын анныгар кыптыыйдарын укта сытар буолбуттар. Абааһыны быһаҕынан буолбатах, кыптыыйынан быраҕыллар диэн этиини итэҕэйэн.
Бу курдук оҕолору кытта кэпсэтэн баран, туох диэн санааҕа кэллибитий? Илэ көрбүт киһи соҕотох. Үгүстэр: “Сымыйа, үлүннэрэн, оҥорон этэллэр, куттуу сатыыллар, " - диэн санаалаахтар. Ол да буоллар, маннык түбэлтэлэри чинчийэр дьон кэлэн билсэн, көрөн, ыраастаан барбыттар. Ааннар чанчыктарыгар схема уруһуйдаан хаалларбыттар этэ. Этэргэ дылы, “итэҕэй-итэҕэйимэ” диэбит курдук буолар. Кырдьык, урукку курдук, үрдүттэн “суох да суох” дии олорор эмиэ сыыһа. Туох эрэ баар буолан, биллэр буоллаҕа. Ол гынан баран, манна олорор студеннар куттаммат, итэҕэйбэт курдук тутталлара саамай сөп дии саныыбыт. Тус бэйэҕэр биллибэт буоллаҕына, уопсай уолуйууга кыттыспакка, ыраас өйгөр-санааҕар, бэйэҕэр эрэ эрэллээх буолуохха, холкутук, нус-бааччы олоруохха наада.

Ангелина Васильева,
Федосия Саввинова.