Аудиота:

Санаабын үллэстэргэ сананным. Кэргэним ыраах вахтанан үлэлиир буолан биһиги ыал сыһыаммыт отой алдьанан эрэр. Сорохтор тута саныаххыт: бу дьахтар кыймаҥнаан, диэн. Ол эрээри сыыһыаххыт.

Эрим отой сүгүн олордоруттан ааста, кыра оҕо курдук нуойдуу сылдьар буолбут. Сөп, өйдүүбүн, ыарахан стрессовай үлэлээх диэн. Ол эрээри киһи чугас кэргэнигэр маннык сыһыаннаһара сыыһа дии саныыбын.

Хас эмэ сыл олордубут, оҕолоохпут. Араас элбэх кыһалҕалары иккиэн тэҥҥэ өйдөһөн-өйөһөн, күүс-көмө буолан ааһан олоробут. Арай кэргэним аһара күнүүһүт. Мин онно сылтах биэрбэппин эрээри бэргии-бэргии, фантазиялыы-фантазиялыы күнүүлээн тахсар. Телефонун үһүс гудокка диэри ылбатахпына тута “кими кытта сытаҕын?” диэн буолар. Ватсап ыыттаҕына тута киирбэтэхпинэ эмиэ биир сор.

Аны вахтатыттан кэллэҕинэ ахтан аҕай кэлэр, дьол бөҕө. Онтон аҕыйах хонно да тэйэн хаалар, миигиттэн нервнайдыыр курдук буолар. Сороҕор хаппырыыстаан “таптаабаппын, бэйэҕин көрүммэккин, оҥостубаккын” диир. Айыы-ы, акаары дуу диэхпэр дылы. Киһи онно-манна бараары оҥостоору гыннаҕына эмиэ биир сор. Хайа дьээдьэҕэ көтөөрү киэргэнэҕин, оҥостоҕун диэн.

Чэ, короче, иннин-кэннин билбэт буолаары гынным. Аны миигин сэниир курдук саҥартыыр, туттар-хаптар буолбут. Улахан сах үлэлээн кэлбит буолан. Вахтатыттан кэллэҕинэ дьиэтигэр тугу да гыннарбаппын, бөҕү да тохпот. Ас арааһа, дьиэ ырааһа, хоонньу сылааһа. Бэйэм ахтан өссө күүскэ таптыыр курдук буолабын. Иннигэр-кэннигэр түһэ сылдьабын, эрим кэлбититтэн дьоллонон.

Онтум баара миэхэ оннук истиҥник, сылаастык сыһыаннаспат, хомоторо-кэлэтэрэ элбээтэ. Вахтатыгар барда да нуойдаан, хаппырыыстаан биэрэр. Айуу-айа, отой сылайан эрэбин. Мин киниэхэ үчүгэйдик сыһыаннаһарым курдук кини миэхэ эмиэ үчүгэйдик сыһыаннаһыан баҕарабын – уонна бүттэ! Өссө сааппакка миигин сэниирдии мээнэ саҥартыыр: “Тиийдэххэ прост*ка саайыам этэ”, – эҥин диэн. Миигин хомойор эҥин диэн санаабат буолбут.

Мин отой ханна да сылдьыбаппын, дьүөгэлэрбиттэн тэйиппитэ, дьөрү сыаналаах моднай таҥас да ылан кэппэппин. Дьиэтээҕи тиран курдук. Таптыырым бэрт тулуйан өйдүү сатыыбын да, дьэ төрүөт булан син биир кыыһырсабыт.

Вахтовиктар ойохторугар бары итинник сыһыаннаһаллара буолуо дуо? Хата стерва дьахтар эбитим буоллар баҕар атын буолуо эбит. Сыһыаммын уларытан стерва буолабын дуу? Бэйэтин сэнээн, сордоон, албыннаан, хомотон, бэйэм эрэ иннибин санаан, оностон-туттан бэйэбэр эрэ олоробун дуу?

Кини үрдүк хамнаһын, дьиэтин-уотун иһин ымсыыран ойох тахсыбыт буотахпын. Туга туох сылдьар, үлэтэ да суох этэ, оннук эр киһилиин таптаһан

эриссэн ыал буолбуппут. Куруук дьоллоох этибит. Билигин аматын да иһин баай-дуол туһугар тулуйар диэн наһаа дии. Мин кини миэхэ сыһыаныттан киһи быһыытынан сылайдым диэн санаабын үллэһинним. Хамнас туһуттан кэргэниҥ сэниирин тулуйааһын диэн мазохизм буотах дуо?

Кэргэним сылайарын өйдүүбүн. Ол иһин вахтанан үлэ биһиги дьиэ кэргэҥҥэ проблема буолла. Бу кэриэтин аттыбар сылдьан үлэлиирэ эбитэ буоллар отой атын буолуо этэ.

Кэргэммин, оҕобун наһаа таптыыбын, убаастыыбын. Хайдаҕын да иһин оннооҕор 4 ыйга вахтаҕа бардаҕына таҥнарар туһунан да төбөбөр суох! Мин дьиэ кэргэммин, көмүс уйабытын харыстыы, араҥаччылыы, сыһыаммытын алдьаппат буола сатыыбын.

Саатар вахтатыгар көҥүллээбэттэр, кэргэттэрин кытта сылдьалларын. Барсыам этэ, бииргэ буолар туһугар. Ол сатаммат, көҥүллэммэт. Көннөрү санаабын үллэстэн чэпчиибин. Чугас дьоммор проблемабытын эппэппин, кимниин да үллэстибэппин.

Чэ, бары этэҥҥэ олоруоххайыҥ! Кыыһырсымаҥ. Харыстаһыҥ, ыарахаттары биһиги курдук тулуйан ааһыҥ. Манан суруйан бүттүм…

Вахтовик кэргэнэ.

tuymaada 21 марта, 2026