(Эн саастыылааҕыҥ)

От ыйын 1-2 күннэригэр Тываҕа, Кызыл куоракка аан бастакы норуоттар икки ардыларынааҕы “Мисс-Центр Азии” диэн конкурс буолан ааста. Саха сириттэн Лариса Романова кыттан “Мисс Луноликая” (иккис вице-мисс) аатын ылла.
Бу үөрүлээх сонуну истээт Ларисаны кытта көрсөн кэпсэттим. Кырдьык даҕаны кыайыан кыайбыт: күн курдук сып-сырдык саха кэрэ, нарын кыыһа эбит. Кылгастык кини туһунан сырдаттахха, сааһа 17-тэ, Дьокуускай 14 №-дээх оскуолатын бүтэрбит, 1996 сылтан саҕалаан “Айыы Куо” мода театрыгар дьарыктанар.
— Лариса, конкурс хайдах быһыылаахтык ааста?
— 14-21-Гэр диэри саастаах уопсайа 12 кыыс кытынна. Бурятияттан, Хакасияттан, Калмыкияттан, Тываттан, Соҕуруу Кореяттан оннооҕор Японияттан тиийэ кэлбиттэр. Конкурс тэрийээччитэ — режиссер-постановщик Вячеслав Яковлевич Донгак. Конкурс тоҕо Кызылга ыытылынна диир буоллахха, Азия килбэйэр киинэ бу куорат.
Саха сириттэн соҕотоҕун кытынным. Миигин арыаллаан Григорьева Марина Петровна, “Айыы Куо” мода театрын директорын солбуйааччыта барса сырытта. Конкурска кыттааччылар биир нэдиэлэ устата лицейгэ олорон бэлэмнэннибит. Ол кэмҥэ бэйэ бэйэбитин чугастык билсэн олус доҕордостубут.
Атын омуктар Саха сирэ олус баай дойду диэн өйдөбүллээхтэр эбит. “Алмааһы кэһэ сылдьаҕыт дуо? ” — Диэн ыйыталлар. Уонна, арааһа, кыра-хара, кыараҕас харахтаах кыыһы кэтэспиттэр быһыылаах, миигин көрөн баран улаханнык соһуйдулар. (Лариса уҥуоҕунан барыларыттан уһуннара үһү — 178. )
Конкурс икки күн устата ыытылынна. Маҥнайгы күн — бэйэни билиһиннэрии, национальнай таҥаһы, киэһээҥи былааччыйалары көрдөрүү, купальнигынан хаамыы буолбута. Иккис күн — ХIХ үйэ көстүүмнэрин кэппиппит уонна ким туох дьоҕурдааҕын көрдөрбүппүт. Мин хомуска оонньообутум, оһуохай таһаарбытым. Биири бэлиэтиэхпин баҕарабын — көрөөччүлэр кыргыттары олус өйөөтүлэр, ытыстарын тыаһын харыстаабакка үөрэ-көтө көрүстүлэр.
Конкурс түмүгүнэн “Мисс Центр Азии” аатын Калмыкия кыыһа Екатерина Петушова ылла. Бурятияттан сылдьар Алена Албашеева “Мисс Солнцеликая” (I вице-мисс) буолла. Оттон мин “Мисс Луноликая” (II вице-мисс) аатын сүгэн “Sony” телевизорынан уонна үрүҥ көмүс киэргэлинэн наҕараадаланным.
Бу кыайыыны ситиспиппэр барҕа махталбын тиэрдиэм этэ модельер Августина Филипповаҕа. Кини таҥастара кыайыыбар улахан оруолу оонньоотулар.
— Кыайыыга эрэллээх этиҥ дуо?
— Эрдэттэн хайаатар даҕаны миэстэлэһиэхтээхпин диэн сыаллаах-соруктаах барбытым уонна ону ситистим.
— Ааспыт өттүгэр туох ситиһиилэрдээххиний?
— 1997 Сыллаахха “Мисс Якутия” конкурска кыттан “Вице-Мисс” аатын ылбытым.
— Сорохтор кыраһыабай кыыс конкурска кыттарын сөбүлээбэттэр, дьолун быһа этэн кэбиһиэхтэрэ диэн өйдөбүллээхтэр. Ону эн туох дии саныыгын?
— Олох итэҕэйбэппин. Төттөрүтүн кыраһыабай кыыс бэйэтин дьоҥҥо көрдөрүөхтээх, онон дьоҥҥо үөрүүнү, дуоһуйууну эрэ аҕалар дии саныыбын.
— Түмүккэ кыргыттарга тугу сүбэлиэҥ этэй?
— Кими даҕаны үтүктүмэҥ, кимиэхэ даҕаны маарынныы сатаамаҥ. Хас биирдии кыыс туспа туох эрэ кэрэлээх, хатыламмат дьиктилээх. Ону бар дьоҥҥо арыйан көрдөрө сатааҥ. Ол эрээри тас көрүҥ улахан оруолу оонньообот. Киһи ис дууһата ыраас буолуохтаах.

Галина ГОВОРОВА,
СГУ журналистикаҕа салаатын студена.
Мария ВАСИЛЬЕВА түһэриитигэр: Лариса Романова.
1999 сыл