(Римма Георгиевна кэпсээнэ)

Дьүөгэм Римма кэпсээнин хайдах баарынан сурукка тиһэбин.

Римма Георгиевна дьүөгэтинээн Павлина Павловналыын “суорумньу” дьоро киэһэтигэр сылдьан кэлэн, дьиэлэригэр хайдах эр дьону кытта билсибиттэрин ырыта олордулар… Биир да интеллигентнэй көрүҥнээх киһи суох үһү, бары улуустан сылдьар эр хоһууннар. Соччо дууһата да сыппатар, Римма Георгиевна биир илин эҥэртэн сылдьар аҕамсыйбыт киһилиин билсэргэ сорунна.

Киһитэ спорт маастара, уруккута агрономунан үлэлээбит киһи. Сырдык ыраас хааннаах, саас баттаан таҥхаччы түспүт киһи. Таҥаһа-саба тыа дьонун сиэринэн. Үчүгэйэ диэн арыгы испэт, табах тардыбат. Быһата чөл олоҕу тутуһар киһи. Кэргэнэ күн сириттэн күрэммитэ уонча сыл буолбут. Элбэх оҕолоох. Оҕолоро бары туһунан ыаллар. Римма быйыл сайын даачатын туттаран бүтэрэн киириэн баҕарар. Оннук санаанан салайтаран саҥа билсибит киһитин Игорь Елисеевиһы киэһэ аһылыкка кэлэ сылдьаар диэн төлөпүөнүнэн ыҥырда. Римма 60-нун саҥа ааһан эрэр. Куорат биир кырасаабыссата. Кэргэнэ Клим икки сыллааҕыта арахсан барбыта. Үрүҥ дьиэҕэ сүрүннүүр специалист этэ. Клим бэйэтин билинэр, улаатымсык соҕус киһи. Оҕолоро суох буолан, референт секретара дьахтарга оҕо оҥорон, ол дьахтарыгар арахсан барбыта. Сураҕа, үчүгэйдик олороллор.

Римма Георгиевна культура министерствотыгар главнай бухгалтерынан үлэлиир. Икки хостоох кыбартыыралаах. Кыахтаахтык олорор. Эдэр эриттэн кэлэйэн саастааҕы кытта билсиһэргэ сананна. Киэһэ алта чааска дьиэ звонога тырылыы түспүтүгэр баран аанын аспыта Игорь кэлэн турар эбит. “Аас”, – диэн ыалдьытын аһарда. Дьиэ иһэ минньигэс ас сытынан туолбут. Таҥаһын устан ыйаабытыгар көрбүтэ киһитэ баттаҕа кыыда маҥан эбит. Санаатыгар, Римма бастаан билсэр киһи сибэкки дьөрбөлөөх кэлэрэ буолуо диэбитэ, кураанах ытыһынан кэлбит. Римма кухняҕа ас-үөл тардан киэһэ аһылыктарын аһаабыттар. Оччолоох кэпсэтии тахсыбатах. Римма ыалдьытын кэргэнигэр Климҥэ тэҥнии сатыы олорбут, Клим аҥаар атаҕар да тиийбэт үһү… Баҕар билбэт дьахтарыттан килбигийэрэ буолуо. Буолары-буолбаты кэпсэппитэ буола олорбуттар.

Бириэмэ ырааппыт. Номнуо 10 чаас. Игорь барар санаата суох. Игорь: “Оттон бэйэ-бэйэбитин билсэ таарыйа бииргэ сыттахпытына хайдаҕый?” – диэбит. Ороннорун оҥостон сытыы буолбут. Римма киһитин көрбүтэ алларааҥы түүтэ хап-хара үһү, баттаҕа мап-маҥан. Римма бытыгын быһа үктүөр диэри “бабник” эбит диэбит, түргэнник такси сакаастаан дьиэтигэр ыыппыт. Ыалдьыта да хап-сабар таҥнан хачыгырайан тахсар ааны былдьаспыт. Даача эрэ туох эрэ, хааллаҕа.

Римма кэлэйэн, аны эр дьону кытта

билсэн бэрт диир. Бу 80 саастаах оҕонньотторбут тупсарына сатаатахтара. Киһи истэ-истэ кэлэйэр. Дьэ, буолар да эбит. Олох эриэнэ диэххэ сөп дуу? Сааһыра барбыт киһи соҕотохсуйан, күө-дьаа чэй иһэ-иһэ кэпсэтэр киһиэхэ наадыйара өйдөнөр суол. Табылыннаҕына бэйэ-бэйэлэрин өйдөһөн, өйөһөн бииргэ олордохторуна даҕаны баа буолбат.

Александра КАРДАШЕВСКАЯ.

Дьокуускай.

tuymaada 10 мая, 2026