Аудиота:

Кутуйах тематыгар суруйуом,алы гыныҥ.
Ойохпун кытта арахсан соҕотоҕун олоробун. Саха Сирин ыраах айанньыттара Алдаҥҥа тиэнэ кэлэн баран,таһаҕастара кэлбэтэх буоллаҕына, миэхэ ордууланаллара.
Оннукка түбэһэн уолаттар нэдиэлэттэн ордук буоллулар.
Эдэр дьон хааннара оонньоон сүгүн олорботтор. Биир үтүө күн мед.училищеттан кыргыттары ыҥыран аҕаллылар. Тыаҕа тахсан билсиһэн аһаатыбыт,үҥкүүлээтибит.
Мин Өлүөхүмэттэн сылдьар кырачаан баҕайы нуучча кыыһын кытта билистим. Хаан буккугаһа суох тоҥ нуучча эрээри,ыраас баҕайытык сахалыы саҥарар.
Мин көрдө-көрөөт ис дууһабыттан сөбүлээтим.
Миэхэ кэлэн өрөбүлүгэр хонор. Кини эмиэ оҕонньорун кытта сыһыаннара алдьанан арахсаары сылдьар кэмнэрэ этэ.
“Кутуйах” диэн таптаан ааттыыбын кыыспын. Кутуйаҕым миигиттэн аҕыс сыл балыс,отой,оҕобун курдук таптыыбын. Өһүргэммэт аатыттан,табаарыстарым да бары Кутуйах диэн ааттыыллар. Асчыта - мааны. Борща,кэтилиэтэ минньигэһэ сүрдээх,эдэр кыыс диэтэххэ.
Маамата үөрэтиитэ бэрт быһыылааҕа.
Биирдэ общагатыгар звооннаатым:
-Привет, Кутуйахчаан.

• Аа-аа!!! - диэн сарылыы түстэ кыыһым.
• Туох буолла?! - соһуйдум аҕай.
• Кутуйах сылдьар!

Кэпсэтэр кабинкаларыгар кутуйах киирэн кэлбит.

• Аймаҕым диэн батыстаҕа дии, - мин күлэн быара суох бардым.

Курсун бүтэрэн каникулга бараары турдаҕына:

• Кутуйах,миэхэ кэргэн тахсаҕын дуо?
• Кэллэхпинэ эппиэт биэриэм, - диэбитэ.

Мин суоппар киһи үлэтэ элбэх буолан сайыным түргэнник ааста. Күһүн Кутуйаҕым үөрэнэ кэллим,диэбитигэр көрсөөрү Алдаҥҥа ыстанным. Киһим түөспэр ыйааста түспэтэҕэр,сэрэйдим-миэхэ хомолтолоох сонун күүтэрин.

• Доҕорум,эн биһикки арахсыахха,оҕом туһа диэн оҕонньорбун кытта иллэстим.

Мин хайыам баарай,аһара хомойдорбун даҕаны:

• Чэ,сөп Кутуйахчаан,дьоллоох буолуҥ.
• Эн эмиэ эмээхсиҥҥин кытта иллэһэн көр…
• Көстөн иһэр ини.

Ситинник Кутуйахчааммын кытта араҕыстыбыт. Аҕыйах хонон баран биэс саастаах кыыһым хоно кэллэ. Сарсыарда туран:

• Паапа,эн биһиэхэ ыалдьыттыы кэлиэххин баҕараҕын дуо?
• Маамаҥ утарбат буоллаҕына ыалдьыттыам.

Сарсыныгар маамам ыҥырар диэн илдьэ барда. Онно тиийэн билбитим: кыыһым мааматыгар маннык диэбит:

• Маама,паапабыт биһиэхэ ыалдьыттыы кэлиэн аһара баҕарар. Ыҥырабыт дуо?
• Кэллин ээ…

Күлэн бөҕө буолбуппут кыра оҕо киитэрэйиттэн. Сыһыаммыт тупсан,хоһуттан саахсаланан холбоһон олоробут. 42 сыл ааһа охсубут. Хаһан эбит Кутуйахпын санаан сүрэҕим мөҕүл гынан ылар…