(сиэр-майгы)

Улахан төрүөтэ суох эрээри, оҕолорун түбэһиэх сиргэ охсо-тэбэ сылдьар, кырбыыр, “мин төрөппүтүм — онон хайдах гынарбын бэйэм билэбин” диэн баламат өйдөөх-санаалаах төрөппүттэргэ үөрэх буоллун диэн бу ыстатыйаны бэчээттиибит.
Cоторутааҕыта Дьокуускай куорат милициятын сокуоннай сааһын туола илик оҕо подразделениетыгар улаханнык аймаммыт эбэ 8 саастаах сиэнэ Антоннуун киирэн кэлбиттэрэ. Эбэ эрэйдээх дууһатыгар тута сылдьыбыт ыар санааларын уһуннук-киэҥник кэпсээбитэ уонна сиэнин таҥаһын устан көрдөрбүтэ. Оннооҕор буолуоҕу көрөн-билэн кэлбит ПДН инспектордара уол этин-сиинин көрөн баран, сүрдээҕин долгуйбуттара уонна тута бу дьыалаҕа ылсан үлэлээн барбыттара. Бу быһылааны сиһилии кэпсээтэххэ маннык.
1988 С-ха улахан тапталынан Данил Ч. Ирина Н. -Ныын холбоспуттара, онтон субуруччу икки кыыс, биир уол оҕоломмуттара. Олохторо-дьаһахтара ыарахан буолан, Данил хоту балыктыы диэн барар. Икки сыл буолан баран төннөн кэлбитэ, кэргэнэ оҕолорун иитиитинэн дьарыктаммакка арыгылыы сылдьыбыт, дьиэтигэр араас дьону хоннортоон, ыһыллан-тоҕуллан олорбут. Ол иһин эбэ эрэйдээх сиэннэрин үксүн бэйэтэ көрбүт. Ийэлэрин ПДН инспектордарын туруорсууларынан төрөппүт быраабын быспыттара, онон оҕолору аҕалара иитиэхтээх этэ. Хотуттан кэлэн баран Данил иккиһин кэргэннэнэр, төрөппүт ийэтэ урут аккаастанан интернат көрүүтүгэр биэрбит кыыһын ылан, син олороллор.
Данил Ч. , Уопсайынан, оҕолоругар сүрдээх кырыктаах, улаханнык кыыһырдаҕына, тугунан, ханна охсорун да кэрэйбэт киһи эбит. Оҕолорун кырбыыр сүрүн төрүөтүнэн бэрээдэги кэһиилэрэ, оскуолаҕа бэрээдэктэригэр “3”-Їү, үөрэхтэригэр “3” сыананы ыллахтарына, буолар эбит. Маны аҕа “иитии биир көрүҥүнэн буолар” диэн этэр. 10 Саастаах улахан кыыһын кырбаабат, 9 саастаах Октя үчүгэй сыананы ылар буолуоҕуттан кырбаммат буолбут, оттон “3” сыананы ыллаҕына дьиэтигэр улаханнык куттана-куттана кэлэр эбит. Аҕатын ыарахан сутуругуттан ордук Антон эмсэҕэлиир эбит. Антон бэйэтэ уонна эбэтэ кэпсииллэринэн, кини үс сааһыттан кырбанар. Уолун буруйдаах диэтэ да аҕа курунан, илиитинэн ханна түбэһиэх охсуолуур, этин-сиинин көҕөрдөр эбит. Ардыгар көҕөрбүтүн биллэримээри сымыйа медсправка ылан, оскуолаҕа ыыппаттар эбит.
Бүтэһигин кулун тутар биир өрөбүл күнүгэр оскуолаҕа ыҥырыллан, Андрей бэрээдэгэ мөлтөҕүн истэн, дьиэтигэр кэлэн, уолун атаҕын кэлгийэн баран, этэ-сиинэ бүтүннүү көҕөрүөр диэри илдьи кырбаабыт. Икки тобугунан оҕотун төбөтүн ыга туппутуттан муннутуттан хаан кэлбит, төбөтүгэр искэн тахсыбыт, кулгаахтарын эрийбитэ суола-ииһэ барыта хаалбыт.

Атаҕын, эмэһэтин диэкинэн кур суола арылыччы көстөр.
Доппуруостааһын кэмигэр Данил Ч. Бэйэтин дьайыытын сөптөөҕүнэн ааҕар, оҕону итинник эрэ иитиэххэ сөп диир.
Эбэ эрэйдээх кыбыстара бэрт буолан, уола сиэннэрин кырбыырын дьонтон кистии сылдьыбытын туһунан кэпсиир. Ол гынан баран, учууталларга кэлин кэпсээбит да, онон хаалан хаалбыт.
Антон бэйэтэ даҕаны ыарахан дьиэ-кэргэҥҥэ төрөөн, иитиллэн, кылгас олоҕор элбэҕи көрөн-истэн кэллэҕэ. Киһини кытта улахан киһилии дуоспуруннаахтык, өйдөөхтүк кэпсэтэр, арай харахтара санаарҕаабыт баҕайылар.
ПДН инспектордара уол бааһырыытыгар тута судебнай-медицинскэй экспертиза анаатылар, матырыйаалы барытын хомуйан, дознание органыгар холуобунай дьыала тэрийтэрэ биэрдилэр. Билигин РФ ХК-сын 156 ыстатыйатынан оҕоҕо сөптөөх иитиини биэрбэтин, кинини кытта сидьиҥник быһыыланарын иһин, Данил Ч. -Га холуобунай дьыала тэрилиннэ, РФ ХПК-сын 122 ыстатыйатынан хаайылынна.
Түмүкпэр оҕоҕо маннык, сиэри таһынан быһыыланыы куорат ПДН инспектордарын хараҕын далыттан куотуо суоҕа, буруйдаахтар эппиэтинэскэ тардыллалларын ситиһиэхтэрэ диэн эрэннэрэбин.
Л. Иванова. Дьокуускай.
PS: Ыстатыйа геройдарын ааттара уларыйда.
2000 сыл