Эдэр Саас №3 (19.01.2000)

Биһиги бу күлүмүрдэс күн сиригэр бэрт кылгастык олорон ааһаары, билбиппит үтүөтэ диэн Киһи. Ол киһиэхэ Тапталбытын эппэккэ хаалар төрүөппүт элбэх: бу таптал дуо диэн билбэппит, кыбыстан сатаан эппэппит, өйбүтүгэр күн аайы Кинини кытары кэпсэтэр эрээрибит, көрүстэхпитинэ, тыл тиийбэт, түгэн көстүбэт. Оттон олохпут биһигини талбытынан тутар, араартыыр, биирдэ эмэ көрсүһүннэрэн дьоллуур…
Сарсыарда 5 чаас. Уум көттө, аны утуйбаппын билэбин.
Иллэрээ күн — Эйигин көрсүбүт киэһэбэр, сытан баран, үгэспинэн ол от ыйын 4 күнүттэн хас күн ааспытын ааҕан көрдүм. Мин Эйигин “5”-с автобуска атаарбыт күммүттэн 15 сыл буолара 4 ый уонна аҕыйах күн хаалбыт. Кэнники кэмҥэ сотору олоҕум бүтэр диэн саныыр буоллум. Ол иһин хас биирдии күн ордук кэрэ, ордук күндү буолан көстөр.
Сарсын Эн айанныаҥ, ол кэнниттэн мин эмиэ аныгыскы уон биэс сылга дьоллоох буолуом. Ааспыт уон биэс сылга, ордук бастакы сылларга, Эйигин санаабатах күнүм суоҕа буолуо. Биирдэ эмэ түһээн көрөрүм. Сороҕор, манна, бу сүүһүнэн дьон ортотугар Эн бааргын, миигин көрөҕүн эрээри бэйэҥ чугаһаабаккын дии санааччыбын.
Бүгүн мин кыратык даҕаны Эн санааҕын аймыахпын, Эн кыракый сүрэххин ыарытыннарыахпын баҕарбаппын. Ол эрээри биһиги бэйэбит өйдөөбөккө, билбэккэ сылдьан, атын киһини хомотор, ыарытыннарар идэлээхпит… Ол кэмҥэ мин тапталым Эйиэхэ үгүс даҕаны эрэйи аҕалбыта! .. Мин барытын өйдүүбүн. Эйигин Эдэр, Кэрэ, куруутун үчүгэйдик таҥанар, сытыы тыллаах, оонньуулаах гына өйдүүбүн. Элбэх баҕайы кыра, бытархай кэрэлэри өйбөр тутан хаалбыппын.
Саамай дьоллоох түгэмминэн Пушкин библиотекатыттан фотосалоҥҥа бары аргыстаһан барбыт үтүө күммүтүн ааҕабын. Ол дьоллоох сатыы айан баара-суоҕа 200 м. Усталаах дии санаабытым. Ол иһин мин олохпор 200 м. Усталаах дьиҥнээх, ыраас, толору Дьол баар этэ дии саныы сылдьыбытым. Ол эрээри биирдэ ол сиринэн хааман көрбүтүм — уһуна километр кэриҥэ эбит. Ол аата ол үтүө күн мин Эйигин кытары хаамарбар ол километры көтөн ааспыппын! Эн этиэҕин: “Как всегда! ” Мин испэр “да, как всегда рядом с тобой! ” Диэн эбэн этиэҕим.
Мин билиҥҥи олоҕум туһунан Эйиэхэ сыыһа өйдөбүл хаалбатар ханнык. Өлүү туһунан санаа миигин олох эрэйдээбэт. Билиҥҥи кэмҥэ оннооҕор өлүү туһунан наһаа үчүгэйдик суруйар буоланнар, арааһа, өлөр да интэриэһинэй буолуоҕа. 15 Сыл ааста да, мин санаам уларыйбат. Санаабар бэҕэһээ Эйигин атааран, “5”-с автобус кэнниттэн далбаатыы хаалбыт курдукпун.
Эн бэҕэһээ бэйэҥ кэлэн бастакынан кэпсэппиккэр наһаа махтана саныыбын…

Эйигин хаһан да умнубат О. К. Шон.
PS: Бу сурук суруллубута сэттэ сыл буолла, бүк тутуллубут сирдэринэн тэһиннэ. Эйигин көрсөрүм 8 сыл хааллаҕа буолуо…