Аудиота:

    Омун Уйбаан биирдэ сааһыран иһэн биир дьиктини кэпсээбитэ да киһи итэҕэйиэ суоҕун курдук, эмиэ да дьикти этэ…
Чэ бээ кылгастык кэпсиим, бэйэҕит сыаналааҥ…
Омун Уйбаан кырдьыга борбуйун көтөҕүөҕүттэн булт бөҕөнү бултаата, куһуттан хара тыа мааныылаах кыылларыгар тиийэ, Байанайа мичик гынаахтыыр, кини да кыра сааһыттан эһэкээнэ , эбэлэрэ, байанайа буоллун бэйэтэ билэринэн мэлдьи көрдөһө алгыы сылдьаахтыыр, сөбө дуу сыыһата дуу бэйэтэ да билбэт… Ол курдук улааттаҕа,сайылыгыттан ырааппакка наар хара тыаны харахтана сырыттаҕа. Сэрии кэнниттэн аччык сыллары хара тыа маанылаан улаханнык аччыктаһын диэни билбэккэ бар дьонноро үтүө тыллара элбэхтэ этилиннэ, хайҕанна да…
Биир күһүн идэтинэн кыстык хаар түһүүтэ хара тыатыгар таҕыста, хонугар үүтээнин булан түүл бит курдук утуйан эрдэҕинэ, арай үтээнин аана аһылла түстэ уонна иһиттэҕинэ чэпчэки баҕайы атах тыаһа сурдурҕаан аттыгар кэлэн тохтоото, бүрүнэ сыппыт суорҕанын сэрэнэн арыйда уонна соһуйуу бөҕөнү соһуйда куттанна да. Хаһан да үйэлээх сааһыгар харахтаан көрбөтөх, өссө маннык кэрэ баара буолуо диэн түүлүгэр да баттатан көрбөт буолар этэ, дьэ икки атахтаах иннинэн сырайдаах кыайан ойуулаан оһуордаан хоһуйбат кэрэтэ киирэн турар эбит, хара тыс этэрбэстээх, үргүлдьү кэтиллэр быыһык саҥыйахтаах, онтуката көннөрү буолбатах кырымахтаах хара саһыл кыбытыылаах,саарба самалактаах эбит. Хайдах эрэ куттаныах санаата ааһан хаалан сонурҕаабыттыы көрө сытта, бу кимэ да биллибэт кыыс киирэрин кытта үтээнин иһэ сааскы тыллыбыт мутукча сытынан дыргыйар, ону кытта санаатыгар дуу айылҕатын көтөрүн сүүрэрин саҥата иһиллэргэ дылы гынна, үтээнин иһигэр кустук араас өҥө түһэн сып сырдык буолла.
Онтон иһиттэхҕинэ таһырдьа тыал бөҕө түстэ мэктиэтигэр үүтээнэ ыһыллыах курдук буолла, үтээн иһэ хабыс хараҥа буолла, ону кытта тэбис тэҥҥэ дүҥүр тыаһа лүҥсүйэ , кыаһаана кылырҕаата, кутурар саҥа буола түстэ, тыал тохтоон хаалла, арай өйдөөн көрдөҕүнэ үтээнин үрдэ суох үһү, халлаан бачымах сулустара мичиҥнии чыпчыҥныы түспүттэр ону кытта тэҥҥэ кутурар саҥа дүҥүр тыаһа үөһэ тахсан симэлийэн хаалбыт, биирдэ өйдөнөн хараҕын аспыта, үтээнэ оннунан турар үһү, кини уһуктубут курдук буолбут. Туран оһоҕор хардаҕас быраҕан биэрбит, уонна эһэкээнин алҕаабыт. Ол түүн утуйа сатаабыт да кыайан утуйбатах, эмиэ да түүлүм дуу дии санаабыт.
Кэнники биир кырдьаҕаска кэпсээбитин, Ити кини бултуур сиригэр Үөһээ өтөххө былыр улахан тоҥус баайа олоро сылдьыбыт үһү, бу киһи күннээххэ көстүбүтэ кыыс оҕо төрөөн үөскээн аата ааттаммат удаҕан буолан дьабыныгар көппүтэ үһү диэн

үһүйээҥҥэ кэпсииллэрэ диэбит…
Ол барахсан дойдутугар сиригэр уотугар түһэ сылдьыбыта буолуо, эйигин араҥаччылыыр айыыһытыҥ буоллаҕа буолуо…
Дьэ оннук Омун Уйбаан кэпсээн турар, дьикти дии киһи итэҕэйиэ суоҕун курдук.

Арыылаах, С.