Сайдар санаалаах үгүс үөлээннээхтэрим, студеннар — уһун, ыарахан үөрэх нэдиэлэтин кэнниттэн дуоһуйа сынньанан, үҥкүүлээн, тыыҥҥытын таһаарыаххытын баҕарбаккыт буолуо дуо? Онтон ылан көрдөххө, биһиги Сахабыт Сирин киин куоратыгар эдэр ыччат бэйэтин олоҕун туһугар куттаммакка, “от души оттянись” буолар дискотеката, мин санаабар, соччо суоҕун да кэриэтэ эбит. Оттон суоҕу суоруоҥ дуо, хайдах баарынан сылдьаҕын.
Онон дьэ, күндү ааҕааччыларбын куорат түүҥҥү дискобардарын уонна дискотекаларын устун кыракый экскурсиябар ыҥырабын.
Сэргэлээх уопсайыгар олорор студеннар, эбэтэр “общагалар”, чугастыы СГУ Культурнай Киинигэр олохсуйбут “Submarina” дискотекаҕа сылдьалларын сөбүлүүллэр. Манна аһыы утаҕы атыылыыр бобуллар, ол да иһин буолуо, бэрээдэк өттүн көрдөххө, син хонтуруол баар курдук. Куһаҕана диэн “танцплощадката” үҥкүүлүүргэ олох табыгаһа суох, оттон музыкатыгар прогрессивнай музыка баһылыыр. Киирии билиэтин сыаната 15 солк. ҮөһЭ буолар. Онон киһи сырыттаҕына сылдьар сирэ.
Иккис тохтобулбут — бу соторутааҕыта төрөөбүт күннээбит, куорат саамай “продвинутай” дискобара “Стеллс” буолар. Манна киирии билиэт сыаната 50 солк. Үксэ куорат progressive ыччата сылдьар диэхпин сөп. Уот-күөс, акустика мааны, ол эрэн эмиэ танцпол олус кыракый буолан, олус итии, киһи тыынар да салгына суох буолааччы. Онон сэрэдэҕэ эбэтэр бээтинсэҕэ, киһи аҕыйаҕар сылдьар ордук диэн сүбэлиэм этэ. Сылдьарым тухары манна улахан этиһии-охсуһуу тахсыбытын көрбөтөҕүм.
Онтон “Эльдорадо” уонна “Groove zone” дискотекаларга үксүгэр куорат оскуолаларын оҕолоро, ол эбэтэр тинейджердэр сөөбүлээн сылдьар сирдэрэ буолар.
“Groove zone” уратыта диэн — манна эрэ DJ-дэр виниловай дискэнэн үлэлииллэр, онон дьэ дьиҥнээх DJ-кэй дискотека диэххэ сөп. Бэрээдэк өттүгэр хаһан эмит син биир нуучча-саха диэн айдаарсыы баар буолар түгэннэрдээх. Билиэт сыаната 25-30 солк.
Салгыы проспект устун барыаххайыҥ уонна куорат саамай киин сиригэр турар “МАЙАМИ” дискотеканы ылан көрүөххэйиҥ. Манна үксэ улуустан сылдьар ыччат мунньустар. “МАЙАМИ” ди-джейдэрэ үҥкүү кэмигэр араас конкурстары, оонньуулары тэрийэллэрин уонна поптан, рейвтэн саҕалаан прогрессивнай, альтернативнай музыкаҕа тиийэ араас хайысхалаах композициялары тыаһаталларын үчүгэйинэн ааҕабын. Сорох субуота күн саха эстрадатын сулустара уонна саҥа тахсан эрэр ырыаһыттар ыалдьыттаан, ырыаларын бэлэхтээн ааһаллар. Билиэт сыаната 50 солк., Бырааһынньык күннэргэ 70-100 солк. Буолан ылардаах. Ханна да буоларын курдук, этиһии-охсуһуу син тахсар, онон бэрээдэк таһымын ортонон ааҕабын.
Салгыы биһиги Кулаковскай аатынан Культурнай Киин мраморнай саалатыгар ыытыллар “Анлайк” дискобарга тиийэн ыалдьыттыаххайыҥ. Манна эмиэ саала үҥкүүлүүргэ олус кыра уонна уота-күөһэ соччото суох. Онон, мин саныахпар, “үҥкүүлүөм этэ” диэн олус ыксаабыт эрэ киһи сылдьар сирэ.
Бу соторутааҕыта речпорт оройуонугар аһыллыбыт “Demo—2000” диэн дискотекаҕа сылдьарын сылдьыбатаҕым эрээри, мин билэрбинэн, манна “водоканаллар” уонна эмиэ “үҥкүүлүөм этэ” диэн санаалаах ыччат сылдьар сирэ.
Онон дьэ, хас үлэ, үөрэх нэдиэлэтин кэнниттэн ханна баран “оттянись” буолабыт диэн проблемалаах буоллаххытына, биллэн турар, кумааһынньыккыт туругуттан уонна ханнык ыччат мунньустарыттан көрөн дуоһуйа сынньанан, бириэмэҕитин үчүгэйдик атаараргытыгар баҕарабын.
Студент доҕотторум, кэтэһиилээх сааскы күннэрбит дьэ тиийэн кэллилэр, ол да буоллар, үөрэххитин олох ыһыктан кэбиһимэҥ, кытаатыҥ, уонна аныгыс көрсүөххэ диэри!

СГУ реклама салаатын
студена КЕШИК.
2000 Сыл