— Нохоо эн иирдиҥ дуу, итирэртэн ордубаккын, ийэлээх, аҕаҕын кырдьар саастарыгар сынньаппакка сордорун сордоон эрэҕин, күннэри, түүннэри эйигин кэтэһии, кэбис дьоммун бүгүн сарсын көһөрөн ылыыһыбын бэйэбэр, эн арыгыгын ойох гына сырыт–
Эдьиийэ Хаампый киирбитигэр, уот айах үрдүгэр түһэн күлүбүрэттэ…
— Оо эдьиийим сыыһа мөҕүмэ даа, бэрт кыратык уолаттары кытта харааска ,, тэп,, гыннардыбы, сыллаа таһааран–
Уонна сонун устан ыйаары тэмтээкэйдээн ылла, сыыһа туттан онно баар таҥаһы барытын сууллары тардан түһэрдэ, бэйэтэ эмиэ,, күрк,, гына суулунна…
— Оо эрэйин ньии, күн аайы маннык балайы кытта олоруоххут дуо, хомунуҥ бардыбыт–
Оҕонньордоох, эмээхсин туох үгүһү хомунуохтарай,таҥнан букунастылар, кыыстарын батыһан тахсан бардылар. Сиэннэрэ эбээлээх, эһэлэрэ кэлэн наһаа үөрдүлэр, улахаттар уруоктарын ааҕаллар. Кыыстара ийэлээх, аҕатыгар бэлэмнээбит хоһугар киллртээн, онно баар телевизордарын холбоон биэрдэ…
Хаампый муостаҕа сытан орулаан,сыыҥтаан,харахтаан баран дьэ утуйан мунна хаһыҥыраан барда. Арай түһээтэҕинэ хайа билбэт дьахтара, кэлэн сылаас баҕайы тылынан сырайын салаан ылар. Онно манньыйан сырайа сырдаан, мичээрдээн ылар, ыҥыранар. Онтон түлэй балай уһуктубута, кырдьан түөһэйбит ыта сырайын салаан ньалҕаарытар эбит, дьахтар кэлэ сылдьыа баара дуо, сиргэ силлээт нэһиилэ аттаан турда, хоһун диэкки алчахтаата,киирээт таҥастары сууллан түһээт мунна тыаһаан барда. Онтон туох эрэ кэйбитинии олоро түстэ, эргим ургум көрүннэ. Дьоно ханна бартарай? Кинини кыра оҕолуу оҕолоон муҥнаналлара. Иһэн кэллэҕинэ, ийэтэ өссө кистээн биир үрүүмкэни абырахтыыр буолара. Туран дьонун хоһугар сүөдэҥнээтэ, кураанах ороннору көрөн дьэ,, бабат,, дии түстэ. Муостаҕа,, лах,, гына олоро түстэ, син балачча олорбохтоото…
— Ээ чэ билээт куттаатахтарына сырыттыннар, Аанабар барыахха, бэлэм дьахтар сылаас хоойо баар.—
Туран таҥнан хачыгырайда, чаһыга эҥин наадыйыы суох, уулуссаҕа тахсан балааскайдыы турда…
Аанабар кэллим дии санаа олбуор хатааһыннаах аанын тэбиэлээн лиһиргэттэ,, Аана мин кэллим,, диэн сарылаата,ол быыһыгар хаста да оҕутта. Ол дьүһүлэнэ сырыттаҕына, биир оҕуһу таҥнары туппут курдук киһи тахсан, саҕатыттан өрө ыйаан таһаарда,, Аанаа абыраа,, диэн сары ору бөҕөтүн түһэрдэ.
— Бу баар Аанаҥ–
Ону кытта харҕыттан иҥин араас уоттар чаҕылыс гына түстүлэр да уулусса бадарааныгар,, палк,, гына түстэ, эбиитин массыына хаспыт калиятыгар кыбыллан хаалла…
Син уһуннук дөйө сытта быһыылаах, халлаан сырдаан эрэр, тураары гыммыта бадараана тоҥон хам барбыт, мөхсөр да кыаҕа суох. Арай биирдэ истибитэ оҕолор саҥарсаллар,,Ноо

көрүҥ эрэ, туох эрэ сытар,,
Хаампый босхо илиитин үөһэ уунан баран тугу эрэ саҥара сатаата да айаҕар симиллибит бадараан мэһэйдээн маҕырыыр курдук. Оҕолор сарылаһа түһээт сырсан хааллылар. Өр өтөр буолбата массыына ууну бадарааны ыһан бирилээн кэлэн тохтоото. Хас да киһи кэлэн тардыалаан көрдүлэр да кыайбатылар, сэрэнэн тимир күрдьэҕинэн, хойгуннан,луомунан хоҥнорон ылан оннук массыына кэннигэр тиэйбитинэн балыыһаҕа илтилэр, онно наһыылканнан киллэрэн бааннаҕа сытыардылар уонна сылаас ууну ыыттылар, сырайа эрэ быга сытар гына. Эдьиийигэр субуоннаан таҥас аҕалтардылар. Эдьиийэ соһуйуу өмүрүү бөҕө буолла, дэлби сууннаран ыраас таҥаһы кэтэртилэр, быраастар көрдүлэр иһиттилэр,, хата үчүгэй эбит,, диэн буолла да кэтэһэн турбут милиисийэлэр,, хап,, гына харбаат тутан илдьэн хаайан кэбистилэр…
Аны ыалы суумнаабыт аатырда, түүн үөһэ, ааннарын тэбиэлээн, өссө дьилиэлээх дьахтары араастаан ыҥыра ыҥыра ыһыытаабыт, дьэ дьыалата хаахтыйда. Аны ол эр киһи суукка арахсар сайабылыанньа түһэрэ охсубут,, ойоҕум эрэлэ суох, көссүүлэһэр,, диэн. Дьахтар көссүүм суох диэн утары айдаан бөҕөтүн тарпыт, дьэ көр диэтэҕиҥ…
Арай биир күн Хаампыйы силиэстилээн хабырҕатын туттулар…
— Табаарыс Хаампый Уйбаанабыс эн гражданка Аананы хайдах билэҕин–
— Тыый эдэр сааспыттан биир өтөххө үөскээбит киһим дии–
— Туох сыһыаннааххытый?—
— Ээ онтон ити, хам түм хонобун ээ, эдэр сааһым таптала буоллаҕа дии, арыгы иһэн алдьанабын,баҕар холбоһуо эбитэ дуу–
Доҕоор аан хайа ыстаныар дылы аһылынна да, модьу эт ласха дьахтар сарылаабытынан киирдэ…
— Билээт өссө хам түм хонобун диэбит буола буола, эйиэхэ бу баар–
Аны били саҥа оһон иһэр хараҕыттан эмиэ уот чаҕылыйда. Милииссийэлэр өйүттэн тахсыар дылы кыыһырбыт дьахтары нэһиилэ туттулар…
— Бу туох буола сылдьар дьахтарый, иирээки дуу, итирик дуу үйэтигэр көрбөтөх киһитин кырбыыр–
— Хайа табаарыс бу Аанаҕа хам түм хонобун диэн сибилигин бэйэҥ эппитиҥ дии–
Силиэдибэтэл улаханнык соһуйда…
— Үйэлээх сааспар көрбөтөх дьахтарым–
Быһаарсыы киэнэ улахана буолла, аны эрэ киирдэ. Хаампый иккиэн кырбаатылар үҥсэбин диэн турда…
Арай хос аанын ким эрэ бэрт симиктик тоҥсуйда…
Ааны аһан устан иһэр кубалыы туттан көрүөхтэн кэрэ дьүһүннээх, саха киһитэ сатаан тыла өҕүллүбэт кэрэ куота киирэн кэллэ…
— Аана мин, бу олорор Хаампый мин ыраас маҥнайгы тапталым,— диэт нарын нарыннык мичээдээт Хаампыйын кууһан ылла…
Били ойоҕун Күнүүлээбитэ киһи, бэйэтин дьахтарын уонна саҥа киирбит Аананы тэҥнээн көрдө…
Оо буолар да эбит кини ойоҕо бу Куба мааны далбарга холоотоххо, абааһы олоппоһун курдук эбит, барыта биир үргүлдьү…
Хаампыйга ымсыыра санаата, дьахтарынаан тахсан бардылар…
Куһаҕан үчүгэйдээх диэбиттии, Хаампый олоҕо тосту көннө,оҕо бөҕө субурутта…
Кэһэйдигит дуо арыгыһыттар…

Арыылаах, С.