“Iks-upp” бөлөх саха эстрадатын эйгэтигэр дьулурҕатык киирэн эрэр. Бу кыра кэм иһигэр уолаттар ырыа эйгэтигэр миэстэлэрин буларга сыраларын-сылбаларын ууран бустулар-хаттылар. Саха сирин ыччатыгар номнуо сөбүлэттилэр, бэйэлэрин сүгүрүйээччилэрин буллулар. Ол курдук бөлөхтөрүн састааба эмиэ уларыйда, өссө тупсарар санааттан аны ыллыыр-үҥкүүлүүр дьоҕурдаах кыыһы ылар баҕалаахтар.

Былааннара киэҥ, ол курдук бөлөх продюсера уонна режиссера Аполлон Томскай билиһиннэрбитинэн маннык: “Билигин барыта этэҥҥэ, үчүгэй. Ырыалары сааһылаан, чочуйан оҥордубут. Кулун тутар ортото маҥнайгы альбоммут тахсара күүтүллэр. Ону тэҥэ улахан истиэнэҕэ ыйанар “Iks-upp” бөлөх ойуулаах былакаат тахсыа. Бөлөх инникилээҕин, кыаҕын өйөөн альбом тахсарыгар көмөлөһөр дьон, доҕоттор бааллара буоллар диэн баҕалаахпыт. Өссө эбиэм этэ, айар дьоҕурдаах уһук сиргэ олорор тыа ыччатын айымньылара биллибэккэ-көстүбэккэ хаалан хаалааччы, ону таһаарар сыалтан, үчүгэй хоһооҥҥо уонна мелодияҕа конкурс биллэрэбит. Сүүмэрдээн, талан кыайыылаахтарга “Iks-upp” бөлөх маҥнайгы альбомун, былакаатын бэлэхтиэхпит. Суруйааччылары, мелодистары кытары бииргэ үлэлиэхпитин баҕарабыт.
Бэйэҕит этиилэргитин, суруктаргытын, ыйытыыларгытын маннык аадарыска күүтэбит: Дьокуускай к., Главпочтамп, а/я 235, “Iks-upp” бөлөххө.
Барыгытыгар үтүөнү, тапталы, дьолу баҕарабыт”.
Дьэ онон, кытаатыҥ, кыттыҥ, баҕар сотору эһиги мөрсүөҥҥүтүн “Iks-upp” бөлөххө көрүөхпүт.

Федосия САВВИНОВА.
2000 сыл